მსგავსი იზიდავს მსგავს

ჩადის ერთი ადამიანი უცხო ქალაქში და მიდის რომელიღაც ლუდის პაბთან, რომლის შესასვლელშიც ერთი მოხუცი ზის. გამოელაპარაკება უცხოელი ამ მოხუცს და ეკითხება:

– მე უცხო ვარ ამ ქალაქში და ძალიან მაინტერესებს როგორი ხალხი ცხოვრობს აქ?

– შენ რომელი ქალაქიდანაც ხარ იქ როგორი ხალხი ცხოვრობდა? – შეუტრიალა კითხვა მოხუცმა.

– ჩემს ქალაქში მაგარი უჟმური, ძუნწი და უხასიათო ხალხი ცხოვრობდა, ისეთი რომ მეგობარს ვერ გაიჩენდი. – უპასუხა უცხოელმა.

– სამწუხაროდ აქაც ზუსტად ასეთი ხალხი ცხოვრობს. – მიუგო მოხუცმა.

– ეჰ, ეგრეც ვიცოდი. – ჩაილაპარაკა უცხოელმა, დაღონდა და წავიდა.

ამის შემდეგ, იგივე ქალაქში ჩამოდის სხვა უცხოელი და იმავე მოხუცს იგივე კითხვით მიმართავს:

– ამ ქალაქში როგორი ხალხი ცხოვრობს? 

– და შენს ქალაქში როგორები ცხოვრობენ? – ამ უცხოელსაც შეუტრიალა კითხვა მოხუცმა.

– ჩემს ქალაქში შესანიშნავი ადამიანები ცხოვრობენ, ისინი ძალიან მხიარულები და მეგობრულები არიან, ჩვენ ფაქტიურად სულ ერთად ვიყავით და გვერდში ვედექით ერთმანეთს. – გაბრწყინებული სახით მიუგო უცხოელმა.

– ჰოდა, აქაც ზუსტად ასეთი ადამიანები ცხოვრობენ. – ღიმილით უპასუხა მოხუცმა.