საფრანგეთის სამხრეთ-დასავლეთში, ჟერის (Gers) დეპარტამენტში, მდებარეობს პატარა შუასაუკუნეების სოფელი მარსიაკი (Marciac), სადაც სულ რამდენიმე ათასი ადამიანი ცხოვრობს. ერთი შეხედვით, ეს მშვიდი, ისტორიული დასახლებაა, თუმცა ყოველ ზაფხულს იგი მსოფლიო ჯაზის ერთ-ერთ ყველაზე მნიშვნელოვან ცენტრად გარდაიქმნება. სწორედ აქ ტარდება JAZZ IN MARCIAC, ევროპისა და მსოფლიოს ერთ-ერთი ყველაზე ცნობილი ჯაზფესტივალი.
ფესტივალის ისტორია 1978 წელს დაიწყო. ადგილობრივი მასწავლებლების, მუსიკოსებისა და ენთუზიასტი მოხალისეების მცირე ჯგუფმა გადაწყვიტა, პატარა ქალაქისთვის მუსიკალური დღესასწაული შეექმნა. პირველივე ღონისძიებამ წარმატება მოიპოვა და ყოველწლიურად უფრო და უფრო მეტი მსმენელი და ცნობილი მუსიკოსი მიიზიდა. რამდენიმე ათწლეულის განმავლობაში JAZZ IN MARCIAC-ი ადგილობრივი ინიციატივიდან საერთაშორისო მნიშვნელობის კულტურულ მოვლენად გადაიქცა.
დღეს ფესტივალი ყოველწლიურად ივლისის ბოლოსა და აგვისტოს პირველ ნახევარში ტარდება და ათიათასობით სტუმარს მასპინძლობს. მთავარი კონცერტები უზარმაზარ სპეციალურად მოწყობილ საკონცერტო კარავში იმართება, ხოლო ქალაქის ცენტრალურ მოედანზე, ქუჩებსა და კაფეებში ყოველდღიურად უფასო კონცერტები, ჯემ-სეიშენები და ახალგაზრდა მუსიკოსების გამოსვლებია. ამ პერიოდში მარსიაკი თითქმის მთლიანად მუსიკით ცხოვრობს.
JAZZ IN MARCIAC-ის სცენაზე მსოფლიოს უდიდესი ჯაზშემსრულებლები გამოსულან. მათ შორის არიან ჰერბი ჰენკოკი, ჩიკ კორეა, უინტონ მარსალისი, ბრედ მელდაუ, კიტ ჯარეტი, ნორა ჯონსი, ჯორჯ ბენსონი და მრავალი სხვა. განსაკუთრებული ადგილი უკავია უინტონ მარსალისს, რომელიც მრავალი წლის განმავლობაში ფესტივალის ერთ-ერთ მთავარ სიმბოლოდ იქცა და მარსიაკთან მჭიდრო შემოქმედებითი კავშირი დაამყარა.
წლევანდელი 48-ე ფესტივალი 20 ივლისიდან 5 აგვისტოს ჩათვლით გაიმართება და ფესტივალს ესტუმრებიან: სტინგი, ავიშაი კოენი, ემილ პარიზიენი, ფრედ ჰერჩი, იმანი, მარკუს მილერი, რიჩარდ ბონა, სამარა ჯოი და სხვა მსოფლიო დონის მუსიკოსები.
დღეს Jazz in Marciac მხოლოდ მუსიკალური ფესტივალი აღარ არის. იგი კულტურული მოვლენაა, რომელიც აერთიანებს მსოფლიო დონის შემსრულებლებს, ახალგაზრდა ტალანტებსა და ჯაზის მოყვარულებს მსოფლიოს სხვადასხვა ქვეყნიდან. სწორედ ამიტომ, პატარა მარსიაკი ყოველ ზაფხულს იქცევა ადგილად, სადაც მსოფლიო ჯაზის ისტორია კვლავ და კვლავ იწერება.
ავტორი: Gia Gogatishvili
გია გოგატიშვილის მასალებს გაეცნობით აქ
