ბებიაჩემი მორწმუნე იყო. ძილის წინ ჩუმად ლოცულობდა, სწრაფად და ძალიან გაურკვევლად. ხელები დახრილი ჰქონდა და მხრები ოდნავ აწურული. სახე დაძაბული და ჯიუტი, ძალიან ჯიუტი. თითქოს თვალებში უყურებდა ღმერთს. უყურებდა და ლოცვის დასასრულისას, ხმამაღლა და გარკვევით ეუბნებოდა: ღმერთო ლელაიე სამოთხეში მუახვედრე იცოდე და რომ მუალ, დამახვედრე მაქანე კარგათ.
სოფლის მღვდელი შუა ხნის კაცი გახლდათ. მამაჩემის ბიძაშვილი, პატიოსანი და ამასთან უნდა აღნიშნოს: ერთობ ხუმარა. ჩვენს სოფელში ტაძარი რომ აღადგინეს, ბებია ლამის იქ გადასახლდა. ლელას დაბადების დღესაც იქ იყო. ტიროდა. ღელავდა. შესაწირში არყიანი ბოთლი იდგა. მივიდა. ერთი ჭიქა მორცხვად დაისხა. დალია. მეორეც. შეიძლება მესამეც. შეთვრა. ღვითსმშობლის ხატთან მივიდა და უთხრა: შენ გამიგებ უფრო მალე, დედის ამბები უკეთ იცი, ჰოდა, სანამ მუალ, ლელაიეს სათხუარი უკვე ნათქვამი მაქვს შენი შვილიზა და ჰკითხეო და კიდოო, რაცხა მავიწყდებაო, ჰო, იგიო, აქანე ჩემს დარჩენილ შვილებს უკეთესი სამსახური უშონო ეგებაო.
მღვდელი ამბიონში ყოფილა. გახუმრება გადაწყვიტა და რაღაც გამოსძახა დაბოხებული, ვითომ მამაზეციერის ხმით. რაღაც ისეთი – მგონი, არაყი რომ დალიე, არ გაპატიებო. ბებია შეცბა. სულ ერთი წამით. სახე უცებვე გაუმკაცრა. თხელი ტუჩები გაუჯიუტდა. თავი ასწია და წამოიძახა: მაცალე, ერთი წუთი კაცო, დედაშენს ველაპარაკებიო.
მე მგონია თუ ვინმეს ღმერთთან საუბარი შეუძლია, ასეთი გულწრფელი და ჯიუტი უნდა იყოს. ღმერთიც ალბათ მხოლოდ ბებიაჩემივით ადამიანებს ელაპარაკება. ამიტომაც არ გვსმენია არც მე და არც სოსოს მისი ხმა.
(,,ორი თავგადასავალი”)
******************************
მთვარე იყო ხოლმე ისეთი, სული რომ შეგებერა, ჩაქრებოდა. ხან სად ეკიდა და ხან სად. თეთრი და ფერფრთხილი. მართლა ჩაქრებოდა, სული რომ შეგებერა. ოღონდ ეგ იყო – არავინ არასდროს უბერავდა.
გიორგობაღამის მთვარე.
ნახე – მითხრა ბებიამ – კუდიანები როგორ ფრთხებიან; ,,ანი დადგა, ბანი დადგა, ხე დადგა და წყალი დადგა! წმინდაო გიორგი, დაწერე შენი ჯვარი!”
და შუბლზე მაკოცა.
აქ რა უნდათ კუდიანებს? – ვკითხე მე. ან შეიძლება არც ვკითხე, მაგრამ მიხვდა.
კუდიანები მხოლოდ მაქანე არიენ – მიპასუხა და ხელი ,,ფეხაკრეფით” მომადო.
ძალიან მენატრება ის ხელი და ის შელოცვა. ის გიორგობაღამეები. და მთვარეები. ვერსად ვხედავ. წლებია ვიყურები. სულს არ შევუბერავ, გეფიცებით, ოღონდ გამოჩნდეს.
(წერილები ჩემი ბავშვობიდან)
წიგნი მეორე
გიორგი კეკელიძე
