თბილი ფერებით გადმოცემული სათქმელი და ნამუშევრები, რომლებიც საოცარ განწყობას გიქმნიან – ეს კესო გიორგაძის ნახატებია … პოზიტივით დამუხტული თითოეული ტილო, რომ უნებურად დადებითად მოქმედებს შენზე.
პირველი პერსონალური გამოფენა, რომელზეც ახალგაზრდა მხატვრის 20-მდე ნამუშევარია წარმოდგენილი, ეროვნული ბიბლიოთეკის საგამოფენო დარბაზში მოეწყო.
კესო, ჯერ სკოლის მოსწავლეა. სამომავლოდ დიდი მიზნები აქვს. მომავალ წელს სწავლის გაგრძელებას უცხოეთში გეგმავს. უფრო დიდ წარმატებამდე კი მილოცვებს აქ, ამ დარბაზში იღებს.
კესო გიორგაძე: განსაკუთრებული და სრულიად განსხვავებული დღე იყო ჩემთვის. აქამდე ჩემი ნახატები მხოლოდ ჩემ სკოლაში იყო გამოფენილი, დღეს კი უამრავი ადამიანის შეფასება მოვისმინე და ემოციებითა და კეთილი სურვილებით დავიმუხტე.
– რამდენია ხანია რაც ხატავ და შენი გამორჩეული ნახატი რომელია?
– სულ ვხატავ, ამის გარეშე ჩემი თავი არც მახსოვს. გამორჩეული ნახატი არ მაქვს. როცა ვხატავ მთელ ჩემ ემოციებს და ფანტაზიებს რაშიც ვაქსოვ, იმ მომენტში გამორჩეულად ის მიყვარს.
ჯერ ძიების, პროცესში ვარ. ხან აკრილში ვხატავ, ხან აკვარელში, ხან ფანქარში, მოკლედ შეზღუდვები არ მაქვს. ჯერ ჩემი, გამოკვეთილი მიმართულებაც არ მაქვს. ხატვა მიყვარს და მნიშვნელობა არ აქვს არც მასალას და არც ჟანრს.
