ამერიკელი მწერალი, ეთნოლოგი და ანთროპოლოგი კარლოს კასტანეტა თავის წიგნში ‘’დონ ხუანის მოძღვრება: იაკ ინდიელთა ცოდნის გზა’’ წერს შიშის შესახებ და გამოყოფს ადამიანის ოთხ მტერს.
დონ ხუანის მოძღვრების მიხედვით, სიბერე (და აქედან გამომდინარე, დაღლილობა) ადამიანის მეოთხე და ბოლო მტერია, რომელიც მას ცოდნის მიღებისა და გამარჯვების გზაზე ეღობება.
თუ ადამიანი დაღლილობას სძლევს და ბოლომდე ივლის, აუცილებლად გაიმარჯვებს. რაც უნდა გაგიკვირდეს, უამრავი ახალგაზრდა არის მოხუცი, რომელსაც ცხოვრებაში ჯერ არაფერი გაუკეთებია, მაგრამ უკვე დაღლილია. ასეთი ადამიანის დევიზია – ‘’აზრი მაინც არაფერს არ აქვს.’’ თუ ასეთმა ადამიანმა საქმე წამოიწყო და გზაზე უმნიშვნელო წინაღობა შეხვდა, დაღლილობას იმიზეზებს და ჩერდება. გამოსავალი კი გზის გაგრძელებაშია.
დონ ხუანის მოძღვრების მიხედვით, სწორედ გზის გაგრძელებით ხდება ადამიანის პირველი მტრის, შიშის დამარცხება – ცხოვრების გზაზე მიმავალი ადამიანი სულ შიშით რომ იყოს ატანილი, არ უნდა შეჩერდეს და წინ უნდა იაროს.
ყოველთვის გახსოვდეთ იგავი ორი ბაყაყის შესახებ, რომლებიც რძით სავსე ჭურჭლებში ჩაცვივდნენ. ერთი რომელიც ‘’მიხვდა’’, რომ ბრძოლას აზრი არ ჰქონდა, ‘’მშვიდად’’ ჩაიძირა და დაიხრჩო. ხოლო მეორე – გამწარებული იქნევდა ფეხებს და ფეხების ქნევაში რძე შეიდღვიბა – კარაქად იქცა. ბაყაყმა შეძლო კარაქზე დადგომა და ჭურჭლიდან ამოხტომა. ასე გადაურჩა გაბედული და მებრძოლი ბაყაყი სიკვდილს.
არასოდეს გაჩერდეთ, რაც უნდა დაღლილი იყოთ. აქ გაჩერებაში ბრძოლის შეწყვეტა და სამუდამო გაჩერება იგულისხმება. ეს არასოდეს გააკეთოთ.
გახსოვდეთ, რომ სტატისტიკის თანახმად, ადამიანთა 90% ბრძოლის გაგრძელებაზე უარს სწორედ გამარჯვების წინ ამბობს. ნუ დაემსგავსებით ადამიანებს, რომლებმაც ვერ მიხვდნენ, რომ სულ ცოტა რჩებოდათ წარმატებამდე.
თუ შეჩერდებით და შეწყვეტთ ბრძოლას, სამუდამოდ გამოემშვიდობებით ყოველგვარ წარმატებას. გაბედულად იარეთ წინ და აუცილებლად გაიმარჯვებთ!
წყარო: რამაზ გიგაურის წიგნი ‘’წარმატების 365 გასაღები’’
